ትናንት ቅዳሜ ሐምሌ 11 ቀን 2018 ዓ.ም. በተደረገው የ2026 የዓለም ዋንጫ የደረጃ ማጠቃለያ (የሶስተኛ ደረጃ) ጨዋታ እንግሊዝ ፈረንሳይን 6 ለ 4 በሆነ አስገራሚ ውጤት አሸንፋ የነሐስ ሜዳሊያ ባለቤት ሆናለች።
በማያሚ ስታዲየም በተካሄደው በዚህ እጅግ አስደሳችና ታሪካዊ ጨዋታ ነበር ፤እንግሊዝ በመጀመሪያው አጋማሽ ፍጹም የበላይነት በመውሰድ ጨዋታውን 4 ለ 0 በሆነ ሰፊ ውጤት እየመራች ለዕረፍት ወጥታ ነበር። ጎሎቹን ዴክላን ራይስ (በ3ኛው ደቂቃ)፣ ኤዝሪ ኮንሳ (በ18ኛው ደቂቃ) እና ቡካዮ ሳካ (ሁለት ጎሎች) አስቆጥረዋል። በሁለተኛው አጋማሽ ፈረንሳይ ተቀያሪ ተጫዋቾችን በማስገባት ከፍተኛ ማጥቃት የሰነዘረች ሲሆን፣ ውጤቱን ወደ 4 ለ 3 በማጥበብ ጨዋታውን እጅግ አስጨናቂ አድርገውት ነበር ።
እንግሊዝ በቡካዮ ሳካ የፍጹም ቅጣት ምት ጎል መሪነቷን ወደ 5 ለ 3 ካሰፋች በኋላ፣ በጭማሪ ሰዓት ኡስማን ዴምቤሌ ለፈረንሳይ አራተኛ ጎል ቢያስቆጥርም፣ ጁድ ቤሊንግሃም በ98ኛው ደቂቃ ላይ አስደናቂ ጎል በማስቆጠር የእንግሊዝን የ6 ለ 4 ድል አረጋግጧል።
አርሰናሉ ኮከብ ቡካዮ ሳካ 3 ጎሎችን (ሃት-ትሪክ) በማስቆጠር ለሀገሩ ድል ትልቁን አስተዋፅኦ አበርክቷል። የፈረንሳዩ ካፒቴን ኪሊያን ምባፔ በዚህ ጨዋታ 2 ጎሎችን ያስቆጠረ ሲሆን፣ በአጠቃላይ በዓለም ዋንጫ ታሪኩ ያስቆጠራቸውን ጎሎች ወደ 22 በማሳደግ የሊዮኔል ሜሲን ክብረ ወሰን ሰብሮ በዓለም ዋንጫ ታሪክ የምንጊዜውም ከፍተኛ ጎል አስቆጣሪ መሆን ችሏል።
ፈረንሳዊው የሚካኤል ኦሊሴ በበኩሉ በዚህ ውድድር ላይ ያደረጋቸውን የጎል አመቻችቶ ኳሶች (Assists) ወደ 7 በማሳደግ የፔሌን የነጠላ ዓለም ዋንጫ ክብረ ወሰን ተጋርቷል።
ይህ ድል እንግሊዝ እ.ኤ.አ. በ1966 ዓለም ዋንጫን ካሸነፈች በኋላ በውድድሩ ታሪኳ ያስመዘገበችው ምርጡ ውጤት ሆኖ ተመዝግቧል። በውድድሩ የዋንጫ ፍፃሜ ጨዋታ ዛሬ እሁድ በስፔንና በአርጀንቲና መካከል ይደረጋል።
የእንግሊዝ ደጋፊዎች በጨዋታው መጀመሪያ ላይ በአሰልጣኝ ቶማስ ቱሄል ስብስብ ምርጫ ክፉኛ ተቆጥተው የነበረ ቢሆንም፣ ጨዋታው በ6 ለ 4 ውጤት ከተጠናቀቀ በኋላ ግን በታላቅ ደስታና እፎይታ ስሜት ውስጥ ሆነው ድሉን አክብረዋል።
አሰልጣኝ ቶማስ ቱሄል እንደ ጁድ ቤሊንግሃምና ሃሪ ኬን ያሉ ትልልቅ ኮከቦችን በተጠባባቂ ወንበር ላይ ማሳረፋቸው በደጋፊዎች ዘንድ ትልቅ ቁጣን ቀስቅሶ ነበር። ሁለቱም ተጫዋቾች ለኮከብ ጎል አግቢነት (Golden Boot) በሚፎካከሩበት ወቅት እንዲህ መደረጉ አልተዋጠላቸውም ነበር። ጨዋታው ከመጀመሩ በፊት የአሰልጣኙ ምስል በትልቁ ስክሪን ላይ ሲታይ ብዙዎቹ የእንግሊዝ ደጋፊዎች በስታዲየሙ ውስጥ ተቃውሟቸውን በጩኸት (Booing) ገልጸው ነበር።
በእንግሊዝ በመጀመሪያው አጋማሽ 4 ለ 0 እየመራች፣ በሁለተኛው አጋማሽ ፈረንሳይ ተከታትላ ጎሎችን አስቆጥራ ውጤቱን 4 ለ 3 ስታጠብበው ደጋፊዎች ከፍተኛ ፍርሃት ውስጥ ገብተው ነበር።
ብዙዎች በማህበራዊ ሚዲያ ላይ “የአራት ጎል መሪነታችንን አሳልፈን ልንሰጥ ነው? እባካችሁ አታሳፍሩን!” በሚል ስጋታቸውን ሲገልጹ፣ አንዳንዶች ደግሞ ለአርጀንቲና በተመሳሳይ መልኩ መሸነፋቸውን በማስታወስ በአሰልጣኙ የዕረፍት ሰዓት ንግግር ላይ ትችት ሰንዝረዋል։
ጨዋታው በጁድ ቤሊንግሃም የመጨረሻ አስደናቂ ጎል 6 ለ 4 መደምደሙ ሲረጋገጥ ደጋፊዎች በታላቅ እፎይታ ስሜት ውስጥ ሆነው ጨፍረዋል።
ሃት-ትሪክ የሰራው ቡካዮ ሳካ በደጋፊዎች ዘንድ ታላቅ አድናቆትን ያገኘ ሲሆን፣ ለምን በሌሎቹ ጨዋታዎች በደንብ አልተሰለፈም የሚል ጥያቄም አስነስቷል።የ”Wonderwall” ዘፈን፦ የእንግሊዝ ደጋፊዎች በስታዲየሙ ውስጥ በጋራ በመሆን የኦአሲስን “Wonderwall” የተሰኘ ታዋቂ ዘፈን በመዘመር የነሐስ ሜዳሊያ ድላቸውን በደመቀ ሁኔታ አክብረዋል።የእንግሊዝ ደጋፊዎቹ ጨዋታውን “በዓለም ዋንጫ ታሪክ የታየ እጅግ እብድ እና አስደሳች ጨዋታ” ሲሉ ገልጸውታል።
